Pomoc woporam wulkeje wody(lh) | 2010-08-22 |
|
TCM a Caritas pomhatej Kamjenc. Akcije Carity Hornja Łužica kaž tež Towarstwa Cyrila a Metoda su kónčinam w Čěskej a Pólskej republice, kotrež pod njedawnej wulkej wodu ćerpja, skutkowna pomoc. Přiwšěm je organizacija sama w Zhorjelskich kónčinach potrjechena. Tola Caritas Hornja Łužica bě wo wěcnu pomoc wosebje za pólske město Bogatynia prosyła. Dokelž pak tam hižo dosć pomocnych srědkow maja, su so rozsudźili nazběrane twory do čěskeho Rumburka dowjezć. Srjedu a štwórtk su pola Špitankec w Zejicach a na Ralbičanskej farje dary hromadźili. Nawoda hornjołužiskeje wotnožki Carity Handrij Rjenč je tam wotewza. Jutře podatej so dwě nakładnej awće do Čěskeje, zo byštej přikrywy, nadobu, poćehnjenja, drastu a meble do Rumburka dowjezłoj. Handrij Rjenč je tež w hladarni starych swjateho Antoniusa we Wóstrowcu koordinowanske městno za pomoc wot zapławjenja potrjechenym zarjadował. Serbja su mjeztym w čěskej Chrastavje pomhali, hdźež bě so rěčka Jeřice wulkich zliwkow dla w běhu hodźin na torhacu rěku přeměniła. František Vydra wottam našemu wječornikej rozprawja: „Zašłu sobotu je dwanaće Serbow z Łužicy sem přijěło a tu pomhało. Zamołwići su jim dźěło rozdawali.“ Jednaćel Domowiny Bjarnat Cyž je pomocnu akciju přihotował, po tym zo bě so 11. awgusta na městnje wo wulkich škodach přeswědčił. „Serbska brigada je mjez druhim pomhała wulku kehelernju a někotre swójbne domy wurjedźić“, tak Vydra. Zo bychu ludźo wědźeli, štó tam dźěła, su pomocnicy serbskej chorhoji wupójsnyli. Tež w čěskich Heřmanicach Serbja pomhachu. Škody w tamnišich kónčinach su tak wulke, zo budźe wjacore lěta trać, doniž njebudu wotstronjene. (MiR) Serbske Nowiny 22.8.2010 | |