Dźiwadło wohrožene(lh) | 2010-10-09 |
|
Krajny rada Harig krituzuje namjet dźěłoweje skupiny Budyšin. Krajny rada Budyskeho wokrjesa Michael Harig (CDU) je so kritisce namjetam załožboweje dźěłoweje skupiny wuměłstwo/jewišćo wuprajił. „Zwoprawdźi-li so namjet, načinimy kulturnopolitisce škodu, kotraž njehodźi so hižo sporjedźeć“, praji Harig dźensa SN. Nastork ke kritiskemu wuprajenju je namjet dźěłoweje skupiny, po kotrymž měła Załožba za serbski lud spěchowanje Němsko-Serbskemu ludowemu dźiwadłu na lětnje 800 000 eurow znižić. Zdobom pak je předwidźane, zo móže sej NSLDź dalše srědki za projekty pola załožby wotwołać. „Dóńdźe-li k tomu, by to fundament našeho dźiwadła tak sylnje střasło, zo njebudźe hižo spóznajomne. Jako nošer domu dyrbjeli potom reagować, dokelž njemóžemy při wšej woli dźěru w etaće zapłatać. Tuž měli sylnje do struktury dźiwadła zapřimnyć, štož njeby jenož wukonitosći serbskeho profesionalneho dźiwadła, ale wukonitosći cyłeje dwurěčneje institucije wulce škodźało“, rozłoži Harig. Tuchwilu da wokrjes namjet załožboweje skupiny nastupajo NSLDź pruwować, zo móhł sej jako nošer swójski wobraz stworić. Tež nawodnistwo NSLDź ma dźiwadło za wohrožene, jeli so namjet zwoprawdźi. „Smy z krajnym radu jednoho měnjenja, tež Lutz Hillmann“, wobkrući zarjadniski nawoda NSLDź Gernot Weingardt. Nimo toho njeje nichtó z dźiwadłom abo z wokrjesom rěčał. Tež posudk wo dźěławosći specielnje „serbskeho“ dźiwadła njeje w trěbnej měrje wobkedźbowany. „To je najskerje tak chcyte. Z tutej njewěstosću za přichodne lěta etat zestajeć, to sej njemóže nichtó wote mnje žadać. Po tutym namjeće je dźiwadźelenje definitiwnje wohrožene“, rjekny Weingardt. (JaW) Serbske nowiny | |